Ja te vidim

–         Kaj to bu revija za XXXL modele? – bocka me opet jedan moj pajdaš prirasel mi srcu dok je čul da bum sutra proparadirala po deskama pozornice u ulogi madekenke. Aha, dobro ste pročitali. Madekenka, glavom i bradom!! Ja!!! Mama na kvadrat!! Naravno, ne sama, u pratnji prde i bjaceka. Oni su moj obrambeni štit. S ta dva mala čudovišta mama je hrabrija, svet je lepši i sve je puno lakše.

Cure z Male modne akademije mesecima su se trudile šivati i kreirati, a sutra budu sve pokazale u Domu mladih. Njihovi modeli sutra budu u centru pažnje pod svetlima reflektora. To budu mlade deklice, visoke i tanke kak jele, onak kak se šika da budu manekenke. Pred nekima od njih morti je i ozbiljan posel hodanja po pistama. Nakon kaj se one pokažu i ostave gledalište bez daha nastupamo mi, malo ozbiljnije žemske, modeli u najboljim godinama. U godinama kad nas bez obzira na sve više nije sramota bilo kaj pokazati i dobro se osećamo u svome telu jer smo bez obzira na leta ostale zdravog i vedrog duha. Morti imamo koju boru i kilu zviška, ali sad ih napokon znamo nositi.

No, moram pojasniti da nas je naša pajdašica stilistica malo dobila na foru. Nakon kaj je pred nas stavila zamolbu omotanog kak štruklja, a mi pristale, tek nam je onda pojašnjeno do kraja da bu to nekaj za ozbač, pred pravom živom publikom koja bu nam mogla fućkati i z jajcima nas zgađati. Gulp. Nakon kaj smo sve nekolko put odgulpirale knedline v grlu ipak smo i opet pristale. Kaj sad. Ak moru dekličke pa moremo i mi. Go go go dekle!

Opravila nas je lepo, svaka bu nosila klajdu u svom điru. Doma smo naravno sve to nekolko put sprobavale pa se nagledavale v špigljin. Dok na tu halju Špicerice instaliraju i pravu frizuru rezultat bu verujem veličanstven, a mi transformirane do razine neprepoznatljivosti. Prda i bjacek zadovoljni su svojim outfitima iako vidim da bjaceka nekak više zanima prdina suknjica nego ono kaj bu on na se moral navleči, ali nema smisla da po pisti kaže nogometaške noge u roza baletnoj haljinici kak doma.

Sad je sve spremno, natrag nema. I kak nas je na probi instruirala naša šefica Melita na pozornicu se mora ziti bez obzira el se prije zvlekla očica na štramplji, pukla naramenica na grudnjaku ili poderala halja duž celih leđa. Ak se i dogodi, pravimo se da se nije. Ima da se svi nacrtate ne naravno zbog nas već zbog ovih mladih kreativnih talenata koji moraju pokazati kaj znaju i umiju njihove ručice.

Samo hrabro dekle! I da se dogodi kakav popikanac i padanac nikaj zato. Bar bu publika pljeskala kak spada.

Program počinje v 19. Vidimo se.