Lepo je bilo na Šoder grabi

Ljetne bazezancije osim na Cerinama krenule su i u našem dvorištu. Kak deca rastu tak nam je i kopanja za banjanje sve veća. Neki smo dan na dvoru instalirali gotovo „pravi“ olimpijski bazen promjera 240 centimetara, dubine 38 centimetara. Uz njega smo nabavili i nekaj dodatne opreme poput pištolja na vodu, mreže za ribice, lopte kojima su se u bazenu mam pridružile sve prdine barbike i jedan ken. Uživancija samo takva.

Iako u tu našu dvorsku kopanju idu puni kuferi vode, kad ovaj gore nakuri prek 30 ne gleda se na kazaljku vodomjera nego se traži slamka spasa. Tak se jedino more, dok se nemre na more. A ono naše podravsko, na svega 15 kilometri nam udaljeno i ovo nam leto nebu od prevelke pomoći. Kakva šteta!! Dok se samo setim tih davnih vremena kad smo u kolonama migoljili prema toj oazi mira i odmora. Nije bil problem ni prošetati se od stanice Botovo tih kilometar po najjačoj pripeki. Gužva je bila da si jedva par kvadrata slobodnog našel kaj bi rasprostrl ručnika za svoju pozadinu. Išlo se tam s frižider torbama na celi dan. Jelo se i pilo, veselilo i družilo. Ni more našoj Šoder grabi nije tad bila neka konkurencija. Još mi je i sad milo dok se setim kak sam nakon celodnevnog namakanja sočno mljackala jeger i paradajz na ručniku.

Dok sam malo poodrasla, ko srednjoškoljka, Šoder graba je meni i pajdašicama i nadalje bila omiljeno ljetovalište. U našoj vili Propuh boravile bi celi mesec.  E to je bil život. Pravi robinzonski. Bez struje i vode. Zubi su se prali žvakačama, veša bi preprali dok je koja od nas opala u vodu. Al je zato noćni život bil nezaboravan. Delal je onda i disko na Lazinama i Plavi labud i dućan je bil otrprti. Čak je i u kamp znal neko tu i tam zalutati. Društvance za feštu skupilo bi se u predvečernjim satima sam tak. Nije trebalo ništ dogovarati, svi su znali da su k nama dobro došli. Lumpalo se do jutra, a onda bi se prek dana, dok je sunce pržilo, spalo i odmaralo, pripremalo za noć koja je bila pred nama.

Šteta kaj se danas takvih divnih vremena provedenih na Šoder grabi moremo setiti samo na slikama. Kakav dragulj nam je pod nosom, a ne znamo ga iskoristiti. Neko drugi bi čuda s toga napravil, a niko od naših Podravci dubljeg žepa nema ideju ni interesa vrnuti Šotki barem dio starog sjaja. Zato mi u potrazi za osvježenjem ostavljamo novce na mađarskim banjama dok ovaj naš biser zjapi prazan i pust ko uspomena na neka lepša i bolja vremena.

Mozak mi zakuhal, a prazan zaslon ekrana upravo je ovog trena postal moj najveći neprijatelj. Ne zamerite. Kidam nalijevo.